Jörundur Þór fékk að skrifa smá skilaboð til ykkar

pðk,æp,okdcd ,,g+*

4s,m,,iojpoicccccccccAX

Amma og afi

Ég var að koma heim frá því að vera í heimsókn hjá ömmu og afa í Hafnarfirðinum. Ég er voðalega hrifin af þeim og geri lítið annað en að vera góður strákur og brosa til þeirra. Valli frændi var líka að leika við mig og ekki fannst mér það leiðinlegt. Ég á örugglega eftir að fá að elta hann þegar ég verð aðeins eldri.
Ég sofnaði svo í bílnum á leiðinni heim og mamma lét mig svo út í vagn þegar við komum heim en ég var ekkert sáttur við það og vildi miklu frekar dást af kartöflugrösunum hennar mömmu og fylgjast með geitungunum og mæju býflugu sveima um. Mamma lagði mig svo aftur og ég sofanði á endanum, en líklega mun ég vakna aftur eftir 45 mínútur því ég sef ekki lengur í einu þessa dagana á daginn. Mamma kvartar ekki því ég sef svo vel á kvöldin og á nóttinni, t.d. í gær fór ég að sofa rétt eftir kl. 20 og vaknaði um hálf átta í morgun. Geri aðrir betur :)

Kaffihús, o.fl.

Ég fór á kaffihús áðan með mömmu minni og Þóreyju ásamt vini mínum sem er enn í maganum á mömmu sinni. Ég var að reyna segja honum hvernig maður á að haga sér á kaffihúsi, fyrst situr maður eins og engill og lætur fólk dást að sér, svo fer maður aðeins að þreifa fyrir sér og reyna ná í allt sem er á borðinu, þar næst fer maður að hjala og að lokum öskra og þá lýkur kaffihúsaferðinni fljótlega. En ég vissi ekki að það var kominn tími á að fara heim. Ég var alveg afskaplega hrifin af vatnsflökunum hennar mömmu og Þóreyjar, þetta var flaska með gulum tappa og ég var svo heppinn að fá að halda á einni og að sjálfsögðu tróð ég tappanum upp í mig, það er svo gott því hann er hrjúfur og nuddar því tannholdið vel því mér er farið að klægja all verulega og svo slefa ég svona 1/2 líter á dag. Mamma veltir því oft fyrir sér hvaðan allt þetta vatn kemur.
Núna fæ ég orðið hrísgraut á hverjum degi, áður en ég tek fyrsta lúrinn minn úti í vagni. Ég er alltaf að verða duglegri og duglegri að borða hann en stundum fer ekkert ofan í maga. En ég er svo lítill ennþá að ég er bara að læra þetta. Ég fékk tvisvar gulrótarmauk en mamma ákvað að bíða aðeins lengur með það handa mér, prófa aftur þegar pabbi fer í sumarfrí.
Mér finnst mjög gott að sofa á nóttinni, en á daginn vil ég bara vaka. Tek reyndar nokkra 45 mínúta lúra, mamma er alltaf að setja mig út í vagn og taka mig inn. Hún nær stundum að láta mig sofa aðeins lengur með því að koma og setja snuðið upp í mig.

Gulrótarmauk

Núna er mamma á fullu að gefa mér eitthvað nýtt að borða, ég fékk í dag að smakka gulrótarmauk í fyrsta skipti. Það var alveg rosalega gott, miklu betra en þessi hrísgrautur sem mamma er búin að vera gefa mér síðustu daga. Ég fékk bara smá gulrótarmauk svona í fyrsta skiptið, hefði alveg getað borðað meira en geri ráð fyrir að fá meira á morgun ef ég verð góður. En af því ég er alltaf svo góður þá hlýt ég að fá það :)
Í gærkvöldi velti ég mér yfir á magann í fyrsta skipti í rúmminu mínu, hingað til hef ég bara gert það á gólfinu. Mömmu og pabba leist nú ekkert á það að ég ætlaði að sofa á maganum, en ég var steinsofandi þegar ég gerði þetta. Pabbi færði mig því aftur yfir á bakið og þannig svaf ég í alla nótt.
Munið að kvitta í gestabókina mína :)

Grautur...

Ég fékk graut í fyrsta skipti í dag, bæði í morgun og aftur í kvöld. Ástæðan fyrir því að ég fékk tvisvar fyrsta daginn er sú að ég kyngdi eiginlega engu af honum í morgun, fannst þetta svo skrítið, en í kvöld kyngdi ég svona ca. 1 munnbita. Mér finnst ég að sjálfsögðu orðinn rosalega stór að vera byrjaður að borða og hlakka til að fá að smakka fleiri tegundir, en þangað til ég verð 4 mánaða fæ ég bara ca. 1 tsk af hrísgraut á dag, svo mun ég líklega fá að smakka gulrætur, banana og kartöflur þegar ég verð 4 mánaða, eða um Verslunarmannahelgina :)

Var að koma heim úr sveitinni hjá afa og ömmu

á Fjósum. Þar var mikið dekrað við mig, alltaf einhver tilbúinn að halda á mér sem er ekki slæmt. Ég vorkenni mömmu smá á morgun þegar ég mun að sjálfsögðu biðja um sömu "meðferð" og ég fékk á Fjósum hjá afa og ömmu.
Ég fékk að fara í göngugrind í fyrsta skipti í dag sem ég fékk lánaða hjá Fannari frænda mínum. Mér fannst það ekkert smá mikið sport, svo fórum við í mat til Hólmars vinar míns í kvöld og á meðan fullorðna fólkið borðaði sat ég í hástól við borðið og fylgdist með, fannst það ekki leiðinlegt :)
Ég er búinn að læra aftur að velta mér yfir á bakið og fer því í hringi á gólfinu núna, áðan fór ég svo langt áður en mamma náði að stoppa mig að ég rak höfuðið í borðfótinn á eldhúsborðinu en sem betur fer var höggið ósköp vægt að ég meiddi mig ekkert, brá ekki einu sinni enda orðinn svo stór strákur.
Núna sef ég vær í rúmminu mínu, sofnaði í bílnum á leiðinni heim og sem betur fer voru mamma og pabbi búin að setja mig í náttgallann svo ég gat bara haldið áfram að sofa.

Snúningur + hittingur

Ég er alveg óstöðvandi þessa dagana, ef mamma setur mig á gólfið á bakið þá sný ég mér eins og skot yfir á magann, en í öllum látunum að læra að snúa mér yfir á magann hef ég gleymt því að snúa mér aftur yfir á bakið eða það heldur mamma amk. Kannski vil ég bara ekki lengur liggja á bakinu. Þar sem ég er stundum svolítið óþolinmóður þá dugar mér ekki að vera á maganum því ég vil byrja að skríða sem fyrst. Ég geri heiðarlega tilraun til þess, fer upp á hnén en gleymi að samhæfa efri og neðri búk og lyfta báðum í einu. En það kemur, ég er bara 15 vikna, þriggja og hálfsmánaða gamall.
Á morgun ætla vinir mínir að koma í heimsókn, hann Sverrir Styrkár, Guðbjörg Elísa og Ebba Katrín ásamt mömmum sínum sem voru/eru allar að vinna með henni. Ég er elstur, svo kemur Ebba Katrín, þar á eftir Sverrir Styrkár og svo Guðbjörg Elísa. Mikið rosalega verður gaman að hitta þau.

Ég velti mér af baki yfir á magann

í morgun í fyrsta skipti hjálparlaust. Þegar ég segi hjálparlaust þá er ég að vísa til þess að í gær gerði ég þetta líka en notaði leikgrindina mína til að tosa og spyrna í, ég þurfti hana svo ekki í morgun. Þegar ég var búinn að velta mér yfir á magann ákvað ég svo að fara aftur yfir á bakið og gerði það eftir að hafa náð góðri stöðu á maganum. Ég var semsagt ekki að nota veltinginn til þess að fara til baka, ég kláraði báðar velturnar í sitthvoru lagi :) Mamma og pabbi eru að rifna úr stolti en finnst þetta heldur snemmt þar sem ég er bara þriggja mánaða. Hvað skyldi ég nú læra að gera næst?

Húsdýragarðurinn

Ég fór í fyrsta skipti í dag í húsdýragarðinn með mömmu minni. Ég svaf nú í vagninum mest allan tímann en fékk þó aðeins að koma í fangið á mömmu og skoða dýrin. Ég var voðalega hrifin af selunum, amk starði ég á vatnið sem þeir voru að synda í. Hvort sólin sem skein og endurkastaðist af vatninu hafi verið það sem vakti athygli mína eða selirnir sem hreyfðust í því skiptir ekki höfuð máli, mér fannst þetta amk mjög áhugavert. Mamma er voðalega mikið að leyfa mér að vera vakandi úti þessa dagana enda búið að vera óvenju hlýtt á Íslandi í sumar að okkar mati. Hún fer stundum með mig í göngutúr út á götu og aftur til baka, þá fæ ég að sjá bíla, tré og hús. Um daginn vildi hún endilega að ég kæmi við tré í Laugardalnum en ég var ekki sammála henni og ég vann :)
Ég er líka að ganga í gegnum miklar skapbreytingar, t.d. í gær grét ég svo mikið (þegar ekkert var að mér) að ég fékk ekka í fyrsta skipti. Mamma og pabbi áttu ekki til orð en tókst að hugga mig og þá fór ég að sofa. Ég er mikið að prófa þau þessa dagana, sjá hvernig þau bregðast við og athuga hvað ég kemst langt, en mamma er svo bókstafstrúa varðandi uppeldið á mér að stundum verð ég að gefa undan :) Hún vill t.d. ekki vagga mér í svefn í vagninum, hún vaggar mér til þess að róa mig ef ég öskra mikið en passa sig alltaf á því að stoppa áður en ég sofna og lætur mig sofna sjálfur. Hún las það í bókinni Draumaland að börn læra að sofna sjálf og oft eru það foreldrarnir sem eyðileggja þann hæfileika hjá börnum og enda á því að þurfa að svæfa börnin sín. Hún ætlar að gera allt sem í hennar valdi stendur til að sjá til þess að ég sofni sjálfur það sem eftir er...sjáum til hvernig það gengur hjá henni, mér finnst hún soldið bjartsýn og það finnst öðrum líka.

Mamma mín á afmæli og ég held hún sé orðin rugluð!

Þessa dagana er ég farinn að sýna aðeins meiri skapsveiflur en ég gerði fyrst. T.d. fer dótið mitt óskaplega mikið í taugarnar á mér ef ég næ ekki að troða því upp í mig, mömmu og pabba finnst það svo fyndið að þau sitja bara og hlæja af mér þegar ég verð rauður í framan úr reiði. Svo eru allir miðar á öllum böngsum rosalega skemmtilegir, ég næ oft góðu taki á þeim og get þar af leiðandi aukið líkurnar á því að ná bangsanum upp í mig. Í gær velti ég mér yfir á hliðina af bakinu, ég er sko löngu byrjaður að velta mér af maga yfir á bak, en hitt er aðeins erfiðara og því er ég ekki alveg búinn að ná tökum á því en það kemur. Á nóttinni ef ég vakna finnst mér voðalega gaman að leika mér að sænginni minni, ég byrja á því að sparka henni af mér, svo tosa ég hana til mín og kuðla henni utan um mig og reyni að borða hana, mamma er þá fljót að laga hana en hún veit ekki að um leið og hún er sofnuð þá geri ég þetta aftur. Svo þegar ég vakna á morgnanna þá þykist ég ekkert vita hvernig mér tókst að flækja mig í sænginni minni. Áðan var ég að leika mér á leikteppinu og mamma kveikti á útvarpinu, geisladisk og byrjaði að syngja og dansa eins og ég veit ekki hvað, hún er víst orðin gömul kellingin og ég held að hún sé að reyna halda sér ungri, en ég var svo hissa að ég hætti að leika mér og horfði bara á mömmu mína með hissa svipnum mínum sem er stútur á varirnar og augun galopinn.

Ég heiti Jörundur Þór og er Hákonarson. Mamma mín heitir Hildur Jóna og pabbi minn heitir Hákon Ingi. Ég fæddist 31.mars 2009, mamma og pabbi voru búin að bíða ansi lengi eftir mér en ég er sko margfallt biðarinnar virði. Mamma mín er að búa til þessa heimasíðu í þessum skrifuðu orðum meðan ég sef úti í vagninum mínum. Ég hef í raun ekki hugmynd um að hún sé að þessu en vonandi á ég ennþá þessa síðu þegar ég verð stór strákur og fer sjálfur að blogga. Þetta verður amk ágætis dagbók. Kvittið endilega í gestabókina mína.

Mamma ætlar að nota þetta blogg til þess að leyfa fjölskyldu og vinum að fylgjast með mér vaxa og dafna, sérstaklega þeir sem búa langt í burtu og geta ekki knúsað mig þegar þeim langar til. Svo verð ég vonandi prakkari (er strax byrjaður að æfa mig, er í prakkaraæfingabúðum hjá mömmu og pabba) og þá getur mamma skrifað fullt af skemmtilegum sögum af mér hérna inn. En mamma var í gær að kenna mér að tæta af borðinu sem ég sat við, ég var nú ekki alveg að fatta hvað ég ætti að gera en þetta kemur allt saman.

Vonandi á ég eftir að skemmta ykkur jafn mikið og ég skemmti foreldrum mínum sem elska mig meira en allt annað :)